شخصية فيسبوكاوية
انا فيسبوكاوى..تسألنى يعنى ايه .. اقولك ببساطة واحد بيحب "يفيس" كل شوية ومقضيها فيس فيس .. وساب البوك بتاع كليته الله يحرقها ومش طايق يشوف فيس حد غير لما يكون جنبه بوك.. يعنى ابو آخر .. مش طايق يشوف غير فيس البوك ..قصدى الفيس بوك ..تفرق كتيير !اول ما بصحى من النوم .. اقول "اصطبحنا بفيس مين النهاردة؟!! " اقوم فاتح "البى سى" .. وابتدى بقى افتكس فى "ستاتس" تشد اى زباين الفيس .. لازم تكون "ستاتس" متولفة وجديدة .. حاجة كده متشافتش قبل كده والسبب بسيط .. انا عاوز اجمع اكبر عدد من "اللايك" على ال"ستاتس" .. ويا بقى لو تنتشر الكومنتات عليها .. شعور مختلف .. وياحبذا لو حبينا نزود الكومنتات بـــ
:D:D
او
ولا انسى طبعاً زيادة الوشوش اللى بضحك..بتعمل شغل برده .. وش واحد مش بيديك "الفيس" اللى عاوز اعبر عنه...انت مش شايف بقى هيوسع ازاى؟؟
المهم اكتب الستاتس (التى تحتوى على اكبر قدر من جواذب التعليقات .. معلش الفزلكة برده بتدى للواحد قيمة ) زى مثلاَ
وطبعاً فى انتظار اصحابى المطحونين يعملولى لايك عليها ..
واصحابى البايزين .. لكتابة ما بين النقاط .. مع مراقبة التعليقات جيداً .. كل وارد بس المعانى الصريحة لا .. هتبوزوا صورتى على الفيس .. لا طبعاً
او اكتب ستاتس تشعر بها بالازبهلال والتثبيت .. يعنى جملة فيها معنيين .. ودى طبعا هدفها انى انا واللى فاهمنى نزيط سوى على نفس الجملة واللى حوالينا قاعدين مش فاهمبن حاجة .. شعور جامد مش كده
او جملة محدش يفهمها خالص .. ما هو لازم اكون مميز .. هو انا همشى فى طابور العيش ولا ايه .. ها؟؟
خلصنا من الستاتس .. اقعد قصاد "البى سى " منتظر العلامة المميزة باللون الاحمر بتقولى عندك نوتيفيكيشن جديدة ..
قشطة .. اهه "الستاتس" جابت زباين اهه .. ويلالا توعلها انا وانت واحبك اكتر كلما زادت كومنتاتك ولايكاتك .. انت كده بترفع من روحياتى المعنوياتى!
وعلى رأى حمزاوى ... ادينى
نخش فى الصور .. وطبعاً الناس عارفة انا بخرج ليه مع اصحابى .. مش محتاجة كلام خروجة من غير كاميرا .. تبقى خروجة ولا ليها اى 30 لازمة (على رأى الاعلانات) .. يعنى هعمل ايه بفسحة ومتصورتش فيها انا واصحابى ونحط صورنا على الفيس اول ما نرجع ..
والهدف منها .. انى اقول للشعب انى انبسط حتى لو كنت مفقوع من الخروجة .. انتوا نسيتوا ايه هدف المشوار دا اصلاً
وطبعاً الهدف الرئيسى هى الاستيلاء على اكبر كمية "لايكات" وتعليقات على الحاجات دى .. حاجة جامدة صح .. "لديكم 160 نوتيفيكيشن"
وطبعا لو صورة عاجبتنى وعاوز اخلى الناس تعلق غصب عنا .. بسيطة اعمل تاج للشعب كله .. واستنى احلى الكومنتات وانا حاطط رجل على رجل ...
ولزيادة الرقم المكتوب فى الرسالة الحمراء اخاصة بالنوتيفيكيشن .. (فزلكة تبينلك انى حد تقييل) .. اكتب نوتة
شعر حبشتكانات .. اطريق على موقف معجبنيش فى الاتوبيس .. اطريق على الراس الكبيرة .. همممم..فى ايه تانى ممكن نكتب عنه ...
اه .. اطريق على صاحبى الفيسبوكاوى اللى بعمل زيه .. المهم هى انى انقد .. وياحبذا لو بقول كلام حزفرانجى مزرفش مع حبة لغة واستشهادات من الكتب .. تبينلك قد ايه انا مثقف .. مانا لازم اطلع بصورة حلوة من الكلام دا .. مش كده ولا ايه !
وطبعا مانساش اعمل تاج للناس الاكثر رغيا فى الكومنتات .. واللى يحبوا يقروا حاجتى ..آه طبعا .. انا بكتب وبنقى اللى يقرالى ..القراءة عندى مش للجميع .. دا عندها (قصدى عند ماما سوزان)
وطبعا .. متنساش بعد ما تقرا النوت دى انك تعمل انت كمان "لايك" .. وياه لو تعملى كومنت صغير كده يدينى شعلة حماس!
وياويله.. اللى مش هيكومنت ولا هيعمل لايك .. هو حكم على نفسه .. انا هشلحه من اختيارى ليه فى التاج بعد كده .. المقاعد المحجوزة للتاج برده معدودة .. غيرك اولى .. ياباى !!
وآخر حاجة الابليكيشنز .. وياه لما تكون "انيتا" ولا "اسامة منير" بيقولك ايه النهاردة .. اصلى بحب الحاجات دى .. عاشن اكومنت عليها واضحك اصحابى .. آه طبعا .. هيجوا ايه جنبى .. مين اسامة منير دا .. ولا مين انيتا .. حاجة غريبة صح!
ويخلص يومى .. ومفيش مانع اقول لاصحابى انى داخل انام على الستاتش .. وافضل سهران لتانى يوم مستنى آخر واحد بيقولى :
فيسبوكاوى قديم
اندرو اشرف
نو كمنت
ردحذفبس الصراحه كلام كتير معنديش وقت وانا الصراحه قاعده سرحانه فى الفيس انا كمان هههههههههههههههههههه
ردحذف